Categories
Uncategorised

Leabhar Sheirbheisean: Facal -toisich

B’e an t-eadar-theangachadh den leabhar Book of Common Order a’ chiad leabhar a chaidh a chlò-bhualadh ann an Gàidhlig, ann an Èirinn no ann an Alba. Rinneadh an obair le Iain Carsalach, Fear-stiùiridh na h-Eaglaise ann an Earra Ghàidheal agus na h-Eileanan, agus thàinig an t-eadar-theangachadh am follais ann an 1567 leis an ainm Foirm na n-Urrnuidheadh.

Chaidh beagan leth-bhreac den deasachadh air Book of Common Order a chuir Eaglais na h-Alba a-mach ann an 1940 a chlò-bhualadh le duilleagan Gàidh ’nan cois. Anns an earrainn Ghàidhlig bha Òrdaighean airson Seirbheis Mhaidne, airson Sàcramaid a’ Bhaistidh agus Suipear an Tighearna, Seirbheis Phòsaidh, Coisrigeadh gu Dreuchd na Ministrealachd, Ùrnaighean aig Tìodhlacadh nam Marbh, agus Ùrnaighean airson Caochladh Adhbharan.

Tha Common Order an là an-diugh a’ tighinn a-mach ann an cruth Gàidhlig. Ann an Leabhar Sheirbheisean gheibhear òrdaighean a dh’ fhaodas a bhith air an cleachdadh aig Baisteadh, Comanachadh, Pòsadh agus Tìodhlacadh. Aig deireadh an leabhair tha tuilleadh Ùrnaighean.

Tha am Panal fo fhiachan mòra do Chomhairle nan Leabhraichean agus do Urras NicCaoig a thug dhuinn taic-airgid cho fialaidh gu bhith a’ cuideachadh le cosgaisean an leabhair.

Tha an Eaglais gu lèir, chan e a-mhàin Gàidheil na h-Eaglais, fada an comain Comataidh Ghàidhlig a’ Phanail, agus gu h-àraidh Fear-gairme na Comataidh, an t-Oll. Urr. Ruairidh MacLeòid, airson leabhar cho cudthromach a dheasachadh agus a chlò-bhualadh. Tha an leabhar air a chur a-mach le dòchas gum bi e feumail don fheadhainn a bhios air ceann sheirbheisean Gàidhlig agus gum brosnaich e spiorad an adhraidh nar coitheanalan Gàidhlig.

Teàrlach MacDhonnchaidh,
Fear-gairme Panal an Adhraidh
An Cèitean 1996

Categories
Uncategorised

Leabhar Sheirbheisean: Seirbheis Phòsaidh

Nuair a ruigeas bean na bainnse an eaglais, bu chòir do fhear na bainnse agus don fhear-comhailteachd an àite a ghabhail shuas air beulaibh a’ choithenail.

Cuiridh am ministear fàilte air bean na bainnse aig doras na h-eaglaise agus treòraichidh e i a-steach gu aghaidh na h-eaglaise far an gabh i a h-àite ri taobh fear na bainnse. Faodaidh ceòl freagarrach a bhith air a chluich no salm no laoidh a bhith air an seinn am feadh a tha seo a’ tachairt.

no

Faodaidh bean na bainnse agus fear na bainnse tighinn a-steach còmhla agus an àite a ghabhail air an aghaidh.

1. Gairm gu adhradh

Abradh am ministear:
Is gràdh Dia;
agus an tì a tha a’ fantainn ann an gràdh,
tha e ’na chòmhnaidh ann an Dia,
agus Dia annsan.

Dèanamaid adhradh do Dhia.

2. Salm no Laoidh

3. Aithris

Abradh am ministear:
Mur tog an Tighearna an taigh,
gu dìomhnain saothraichidh a luchd-togail. (Salm 127: 1)

Tha sinn air tighinn cruinn an-diugh ann an làthair Dhè,
gu bhith nar fianaisean air pòsadh A… agus B…;
gu bhith a’ gabhail compàirt ’nan aoibhneas,
agus gu bhith a’ gealltainn dhaibh cùl-taic agus gràidh.

‘S e a tha anns a’ phòsadh tìodhlac o Dhia
agus meadhan gràis.
Ann an ceangal maireannach a’ phòsaidh
faodaidh sinn eòlas a chur air aoibhneas Dhè,
a chrutaich sinn, fìreann agus boireann,
’na ìomhaigh fhèin.

Tha am pòsadh stèidhichte air nàdar gràdhach Dhè,
agus air cùmhnant a ghràidh rinne ann an Crìosd.
Tha fear agus bean,
ann a bhith toirt fhèin da chèile ann an gràdh,
a’ samhlachadh gràdh Chrìosd da Eaglais.

Ann am pòsadh Crìosdail,
tha bean-phòsda agus fear-pòsda air an gairm
gu bhith dìleas da chèile,
agus a chèile a ghràdhachadh le meas,
caomhalachd agus tlachd.
Anns a’ chompanachas agus anns a’ chofhurtachd
a gheibhear ann am pòsadh
tha an gràdh corporra eadar fear agus bean
air a choileanadh.

Tha còir aig càraid an ceum seo a ghabhail
anns an spioraid cheart,
a’ toirt fa-near
gu bheil am pòsadh naomh agus maireannach.

Bha ar Tighearna Ìosa Crìosd E Fhèin
air aoigheachd aig pòsadh ann an Càna Ghalile.
Tre a Spiorad tha E an seo còmhla rinne,
airson ar gràdh a neartachadh
agus a shìth agus ‘aoibhneas fhèin a thoirt dhuinn.

4. Ùrnaigh

Abadh am ministear:
Dèanamaid ùrnaigh.

A Dhè ghràsmhoir,
moladh dhut airson uile thìodhlacan do ghràidh,
gu sònraichte tìodhlac a’ phòsaidh.

Tha sinn a’ toirt taing dhut
airson beatha A… agus B… a threòrachadh,
airson an toileachaidh a tha iad a’ toirt da chèile,
agus airson a’ ghràidh agus na h-earbsa
leis a bheil iad a’ cur an aghaidh air an là aoibhneach seo.

Agus a chionn gu bheil fios againn
nach eil nì sam bith làidir, nach eil nì sam bith naomh
as d’aonais,
tha sinn ag ùrnaigh gun neartaich Thu iad le do ghràs
agus iad gan ceangal fhèin ann an cùmhnant pòsaidh.

Deònaich gum bi d’aoibhneas annta,
agus gum bi iad an aoibhneas làn.
Treòraich iad le do ghràs,cuartaich iad le do làthaireachd,
agus glèidh iad ’na do ghràidh;
tre Ìosa Crìosd ar Tighearna.

Amen.

5. Na Bòidean

Seasadh an coitheanal, agus abradh am ministear ris a’ chàraid:
Mar sheula air na bòidean a tha sibh a’ dol a ghabhail,
thugaibh an làimh dheas da chèile.

Abradh fear na bainnse:
Ann an làthair Dhè
agus air beulaibh nam fianaisean seo,tha mise, A…,
gad ghabhail mar mo bhean-phòsda.
Tha mi a’ gealltainn gun toir mi gràdh dhut
agus gum bi mi dìleas dhut,
am fad ’s is beò sinn.

Abradh bean na bainnse:
Ann an làthair Dhè
agus air beulaibh nam fianaisean seo,
tha mise, B…,
gad ghabhail mar m’fhear-pòsda.
Tha mi a’ gealltainn gun toir mi gràdh dhut
agus gum bi mi dìleas dhut,
am fad ’s is beò sinn.

No faodaidh na bòidean a bhith air an cur anns an dòigh seo.

Abradh am ministear ri fear na bainnse:
Ann an làthair Dhè
agus air beulaibh nam fianaisean seo,
a bheil thusa, A…, a’ gabhail B
mar do bhean-phòsda?
A bheil thu a’ gealltainn gun toir thu gràdh dhi
agus gum bi thu dìleas dhi,
am fad ’s is a beò sibh le chèile?

Abradh fear na bainnse:
Tha.

Abradh am ministear ri bean na bainnse:
Ann an làthair Dhè
agus air beulaibh nam fianaisean seo,
a bheil thusa, B…, a’ gabhail A…,
mar d’fhear-pòsda?
A bheil thu a’ gealltainn gun toir thu gràdh dha
agus gum bi thu dìleas dha,
am fad ’s is beò sibh le chèile?

Abradh bean na bainnse:
Tha.

6. Fàinne no fàinneachan air an toirt seachad

Abradh am ministear:
Mar chomharradh air a’ chùmhnant
a tha sibh a-nis air a dhèanamh eadraibh
tha am fàinne seo (na fàinneachan seo)
air a thoirt seachad (air an toirt seachad)
agus air a ghabhail (air an gabhail).

Faodaidh am fireannach seo a ràdh, agus e a’ cur fàinne air meur na mnatha:
B…, tha mi a’ toirt dhut an fhàinne seo
ann an ainm Dhè,
mar shamhladh air gach nì a gheall sinn,
agus air gach nì a bhios againn còmhla.

Ma tha dà fhàinne ann, canadh am fireannach agus am boireannach:
A…, tha mi a’ toirt dhut an fhàinne seo
ann an ainm Dhè,
mar shamhladh air gach nì a gheall sinn,
agus air gach nì a bhios againn còmhla.

Abradh am ministear:
Leis a’ chomharradh seo tha sibh a’ gabhail a chèile,
gu bhith còmhla on là seo a-mach tuilleadh,
co-dhiù as fheàrr no as miosa,
as beairtiche no as bochda,
ann an tinneas agus ann an slàinte,
gu gràdh agus meas a thoirt da chèile,
am fad ’s is beò sibh le chèile.

7. Cur an cèill a’ phòsaidh

Bheir a’ chàraid an làmh dheas da chèile. Abradh am ministear:
A chionn gun tug sibh bòidean da chèile,
agus gun do dh’aidich sibh bhur gràdh da chèile
an làthair Dhè agus an làthair nam fianaisean seo,
tha mise ag èigheach gu follaiseach gu bheil sibh pòsda,
ann an ainm an Athar, agus a’ Mhic,
agus an Sprioraid Naoimh.

Amen.

An nì a cheangail Dia,
na sgaoileadh duine.

8. Beannachadh a’ phòsaidh

Abradh am ministear:
Gum beannaicheadh an Tighearna sibh,
agus gun gleidheadh E sibh:
gun tugadh an Tighearna air ‘aghaidh dealrachadh oirbh,
agus gum biodh E gràsmhor dhuibh:
gun togadh an Tighearna suas a ghnùis oirbh,
agus gun tugadh E sìth dhuibh.

Amen.

Faodaidh a’ chàraid phòsda an ainm a chur ri Pàipear a’ Phòsaidh an-dràsta air beulaibh a’ choitheanail, no aig crìch na seirhbheise còmhla ri dhithis fhianaisean.

[9. Salm no laoidh]

10. Cuibhreannan as na Sgriobtairean
(Leithid Genesis 2: 15; Salm 128; Mata 7: 21, 24 – 27; Marcus 10: 6 – 9; Eòin 2: 1- 11; Eòin 15: 9 – 12; Ròmanaich 12: 1 – 2, 9 – 13; 1 Corintianaich 13; Ephèsianaich 5: 1 – 2, 21 – 33. )

11. Searmon

12. Ùrnaigh

Abradh am ministear:
Dèanamid ùrnaigh.

A Dhè uile-chumhachdaich,
tha sinn a’ toirt taing dhut
airson gach dòigh anns a bheil gràdh a’ tighinn thugainn,
agus airson an aoibhneis agus an toileachaidh
a lorgar anns a’ phòsadh.

Beannaich A… agus B
a chaidh a cheangal ri chèile nad ainm.
Cum iad dìleas da chèile,
agus mar a tha an gràdh da chèile a’ fàs,
gum bi co-chomann aca ri chèile ri amannan aoibhneis,
gun toir iad cofhurtachd da chèile ri là a’ bhròin,
agus gun neartaich iad a chèile ri àm feuma.

Mar thoradh air do làthaireachd ’nan dachaidh
gum biodh i ’na h-àite anns am bi
fàilte agus co-chomann,
tèarainteachd agus sìth.
(Ma gheibh iad clann,
deònaich gum bi iad ’nam pàrantan glice agus gràdhach.)
Beannaich an teaghlaichean agus an càirdean,
a thug gràdh agus càirdeas dhaibh
rè nam bliadhnachan.

Tha sinn ag ùrnaigh airson teaghlach a’ chinne-daonna,
agus air an son-san a tha a’ fulang
agus sinne a’ dèanamh gàirdeachas.
Thoir nas dlùithe oirnn an là anns am bi gach sluagh
a’ tighinn beò ann an sìth
agus ann an eòlas air do ghràdh.

A Dhè shìorraidh,
tha sinn a’ cuimhneachadh orra-san a bha dlùth dhuinn,
a tha air a thol thairis tron bhàs
a dh’ionnsaigh na beatha maireannaich.
Treòraich sinne fa-dheòidh maille riu-san
gu taigh an Athar,
ach am bi teaghlach Dhè iomlan
ann an glòir do làithearachd;
tre Ìosa Crìosd ar Tighearna.

Amen.

Ar n-Athair a tha air nèamh…

13. Salm no laoidh

14. Am Beannachadh

Abradh am ministear:
Imichibh ann an sìth, ann an aoibhneas an Tighearna.

Agus gu robh beannachadh Dhè Uile-chumhachdaich,
an t-Athair, am Mac, agus an Spiorad Naomh,
maille ribh uile.

Amen.

Categories
Uncategorised

Leabhar Sheirbheisean: Sàcramaid a’ Chomanachaidh, no Suipear an Tighearna

1. Fosgladh na seirbhis

Abradh am ministear:
Dèanamaid adhradh do Dhia.

2. Salm no Laoidh (Leithid Salm 100 no Salm 43: 3 – 5)

3. Earrainnean as na Sgriobtairean

Faodaidh am ministear earrainnean a leughadh; mar eisimpleir:
Is beannaichte an dream
air a bheil acras agus tart na còrach:
oir sàsaichear iad. (Mata 5: 6)

Glacaidh mi cupan na slàinte,
agus gairmidh mi air ainm an Tighearna. (Salm 116: 13)

O blaisibh agus faicibh gur math an Tighearna;
is beannaichte an duine sin a dh’earbas as. (Salm 34: 8)

4. Ùrnaigh

Abradh am ministear:
Dèanamaid ùrnaigh.

A Dhè Uile-chumhachdaich,
da bheil gach cridhe fosgailte,
gach miann aithnichte,
agus o nach eil nì uaigneach sam bith falaichte;
glan smuaintean ar cridheachan
le deachdadh do Spiorad Naoimh,
a chum gun toir sinn gràdh iomlan dhut,
agus gun àrd-mhol sinn gu h-iomchaidh d’ainm naomh,
tre Chrìosd ar Tighearna.

A Dhè naoimh agus shìorraidh,
tha sinn ag aideachadh
gun do bhris sinn d’ àitheantan;
pheacaich sinn le ar fèinealachd,
ar n-as-creideamh agus ar fèin-uaill;
cha do rinn sinn ceartas, cha do ghràdhaich sinn tròcair,
agus cha do ghluais sinn gu h-iriosal maille riutsa.

Ann an lànachd do thròcair,
dubh as ar n-euceartan;
nad choibhneas-gràidh,
glan as ar peacadh.

Thoir dhuinn an spiorad deònach
agus an cridhe briste sin air nach dèan Thusa tàir;
agus cuidich leinn a bhith a’ toirt maitheanais do chàch
mar a thug Thusa maitheanas dhuinne;
tre Ìosa Crìosd ar Tighearna.

Gun dèanadh an Dia Uile-chumhachdach tròcair oirnn,
gun toireadh E maitheanas agus saorsa dhuinn
o ar peacaidhean uile,
gun daingnicheadh agus gun neartaicheadh E sinn
anns gach maitheas,
agus gun gleidheadh E sinn anns a’ bheatha
mhaireannaich;
tre Ìosa Crìosd ar Tighearna.

A Dhè thròcairich,
dh’ullaich Thu don dream aig a bheil gràdh dhut
nithean cho math agus gun tèid iad thar ar tuigse.
Dòirt nar cridhe gràdh cho mòr dhut
agus gun gràdhaich sinn Thu os cionn gach nì eile,
agus gum faigh sinn sealbh air do gheallaidhean
a tha os cionn gach nì as urrainn dhuinn iarraidh;
tre Ìosa Crìosd ar Tighearna.

Amen.

[5. Salm no Laoidh]

6. Leughadh

Faodar cuibhreannan a leughadh as an t-Seann Tiomnadh agus as an Tiomnadh Nuadh.

7. Salm no Laoidh
   
(Leithid Salm 118: 24 – 29)

8. Searmon

9. Salm no Laodh
(Leithid Salm 116: 13 – 19.)
Am feadh is a tha na rainn seo gan seinn, bheir na h-eildearan a-steach an t-aran agus am fìon, agus cuireadh iad air Bòrd a’ Chomanachaidh iad, mur a bheil iad cheanna air a’ bhòrd.

[10. An Gàrradh

Far a bheil sin cleachdail, faodadh Gàrradh a chur mu Bhòrd an Tighearna le cuibhreann fhreagarrach a leughadh as na Sgriobtarran – leithid Mata 5: 1 – 16, 1 Corintianaich 13, no Galatianaich 5: 18 – 26. (Ma tha seinn ann ron Ghàrradh agus as a dèidh, faodar salm a sheinn a tha a’ freagairt an t-searmoin.)]

11. Faclan Barrantais

Abradh am ministear:
Èisdibh ris na briathran
anns a bheil an t-Abstol Pòl ag innse dhuinn
mar a chuir ar Slànaighear Ìosa Crìosd
an t-Sàcramaid Naomh seo air chois:

Oir fhuair mise on Tighearna
an nì mar an ceudna a thug mise dhuibhse,
gun do ghlac an Tighearna Ìosa aran,
anns an oidhche anns an do bhrathadh E;
agus air tabhairt buidheachais,
bhris E e, agus thubhairt E,
Gabhaibh, ithibh;
is e seo mo chorp-sa
a tha air briseadh air ur son-se;
dèanaibh seo mar chuimhneachan ormsa.
Agus air a’ mhodh cheudna an cupan, an dèidh na suipeir,
ag ràdh,
Is e an cupan seo an coicheangal nuadh ann am fhuil-sa;
dèanaibh seo, cia minig is a dh’òlas sibh e,
mar chuimhneachan ormsa.
Oir cia minig is a dh’itheas sibh an t-aran seo,
agus a dh’òlas sibh an cupan seo,
tha sibh a’ foillseachadh bàs an Tighearna
gus an tig E. (1 Corintianaich 11: 23 – 26)

12. Coisrigeadh an arain agus an fhìona

Abradh am ministear:
Mar a ghabh an Tighearna Ìosa aran,
anns an oidhche anns an do bhrathadh E,
tha mise a’ gabhail an arain agus an fhìona seo,
gu bhith air an cur air leth o gach feum coitcheann
chun an adhbhair naoimh seo;
agus mar a thug Esan buidheachas
agus a bheannaich E iad,
nach tig sinne dlùth do Dhia
le ar n-ùrnaighean buidheachais.

13. Taingealachd

Tha sinn a’ toirt taing dhut
ann an cruthachadh an t-saoghail,
nauir a leag Thu stèidh na talmhainn
agus a shuidhich Thu clach-chinn na h-oisne,
gun do sheinn reultan na maidne ann an co-sheirm,
agus do rinn uile ainglean Dhè gàirdeachas.
Tre neart do Spioraid,
dhealbh Thu an cruinne-cè;
tre chumhachd d’Fhacail,
thug Thu dhuinn beatha.

Tha sinn a’ toirt taing dhut,
anns a’ chruthachadh naudh,
nauir a thug Thu dhuinn do Mhac gu bhith gar togail as ùr –
oir bha sinne agus ann sinne-daonna gu lèir air tuiteam –
ghabh Thu sealbh oirnn mar do phoball fhèin;
ach an cuireamaid an cèill feartan glòrmhor
an Tì a ghairm sinn à dorchadas
a dh’ionnsaigh a sholais iongantaich fhèin.

Le beatha do Spioraid,
tha Thu a’ lìonadh cridheachan nan creidmheach;
le solas d’Fhacail,
tha Thu a’ toirt dhuinn neirt is gràidh.

Air an adhbhair sin, maille ri do shluagh
anns gach uile àite agus gach linn,
agus le uile chuideachd nan nèamh,
tha sinn a’ cur an cèill do mhòrachd
agus a’ seinn do chliù ann an òran nan aingeal:

Is naomh, naomh, noamh an Tighearna,
Dia an neirt agus a’ chumhachd,
tha nèamh agus talamh làn ded ghlòir.
Hosanna anns na h-àrdan.

Beannaichte gun robh a Tì a thig
ann an ainm an Tighearna.
Hosanna anns na h-àrdan.

Ann an co-bhoinn ri uile shlòigh nan nèamh,
tha sinne an seo air thalamh ag aideachadh do ghlòire,
agus tha sinn a’ toirt taing dhut,
ann an coileanadh nan aimsir,
gun do chuir Thu do Mhac mar ar Slànaighear.

Tha sinn gad bheannachadh
gun do ghabh E nàdar na daonnachd;
tha sinn gad mholadh
gun do rugadh E ann an naomhachd,
gun robh E beò air thalamh ann an coileantachd,
gun do dh’fhuiling E as ar leth,
agus gun tug E buaidh air a’ bhàs;
gun deach àrdachadh gu do dheas-làimh
agus gun tug E dhuinn tìodhlac an Spioraid Naoimh;
agus gun do gheall E gun tilleadh E a-rithist.

A’ cumail cuimhne air ‘obair agus ‘fhulangais,
agus an crochadh air ‘ìobairt shìorraidh,
tha sinn a’ leanntainn eisimpleir-san,
agus a’ toirt ùmhlachd da àithne.

Cuir a-nuas do Spiorad Naomh
gu bhith gar beannachadh-ne
agus a’ beannachadh an arain agus an fhìona,
ach am bi an t-aran a tha sinn a’ briseadh
dhuinne mar cho-chomann corp Chrìosd,
ach am bi sinne a tha gan gabhail
air ar dèanamh tre chreideamh nar luchd compàirt
de a chorp agus de ‘fhuil,
le a shochairean uile,
gu bhith gar beathachadh
agus a’ cuideachadh leinn du bhith a’ fàs ann an gràs,
a chum glòir d’ainmne ro naoimh.

Agus an seo tha sinn gar tabhairt
agus gar coisrigeadh fhèin dhut,
ach am bi sinn nar n-ìobairtean beò,
strìochdte agus iomchaidh airson do sheirbheis,
tre Ìosa Crìosd ar Tighearna.

Trìd-san, agus maille ris-san, agus annsan,
ann an aonachd an Spioraid Naoimh,
agadsa gu robh gach urram agus glòir,
Athair shìorraidh, a-nis agus gu sìorraidh.

Amen.

14. Ùrnaigh an Tighearna

Ar n-Athair a tha air nèamh,
gu naomhaichear d’ainm.
Thigeadh do rìoghachd.
Gun dèanar do thoil
air thalamh, mar a nithear air nèamh.
Tabhair dhuinn an-diugh ar n-aran làitheil.
Agus maith dhuinn ar fiachan,
mar a mhaitheas sinne dar luchd-fiach.
Agus na leig ann am buireadh sinn;
ach saor sinn on olc:
oir is leatsa an rìoghachd, agus an cumhachd,
agus a’ ghlòir gu sìorraidh.

Amen.

15. Briseadh an arain

Abradh am ministear:
A-rèir òrdachadh naomh, eisimpleir,
agus àithne air Tighearna Ìosa Crìosd,
agus mar chuimhneachan air-san,
tha sinn a’ dèanamh seo:
air an oidhche anns an do bhrathadh E,
ghlac E aran
(glacaidh am ministear an t-aran)
agus an dèidh dha buidheachas a thoirt, bhris E e
(brisidh am ministear an t-aran)
agus thubhairt E, ‘Is e seo mo chorp-sa
a tha air a bhriseadh air ur son-se;
dèanaibh seo mar chuimhneachan ormsa.’

Agus air a’ mhodh cheudna ghlac E an cupan
(togaidh am ministear an cupan)
ag ràdh, ‘Is e an cupan seo an coicheangal nuadh
ann am fhuil-sa.
Dèanaibh seo,
cia minig is a dh’òlas sibh e,
mar chuimhneachan ormsa.’

16. Faodaidh am ministear seo a ràdh:
   
Ministear: Ìosa, Uain Dhè,
    Uile: dèan tròcair oirnn.
   
Ministear: Ìosa, Fhir-giùlain ar peacaidhean,
Uile: dèan tròcair oirnn.
   
Ministear: Ìosa, Fhir-saoraidh an t-saoghail,
    Uile: deònaich dhuinn sìth.    

17. An Comanachadh

Faoadar am ministear gabhail den aran agus den fhìon.

Abradh am ministear:
Thigibh dlùth ann an creideamh:
gabhaibh samhladh corp ar Tighearna Ìosa Crìosd
a thugadh air ur son,
samhladh ‘fhala-san a dhòirteadh air ur son,
agus bithibh air ur beathachadh leis-san nur cridhe
tre chreideamh, le taingealachd.

Ann a bhith a’ toirt seachad an arain, abradh am ministear:
Gabhaibh, ithibh.
Is e seo corp Chrìosd
a bhriseadh air ur son.
Dèanaibh seo, mar chuimhneachan air-san.

Ann a’ bhith a’ toirt seachad a’ chupain, abradh am ministear:
Tha an cupan seo ’na shamhladh air a’ choicheangal nuadh
air a sheulachadh le fuil Chrìosd,
a chaidh a dhòrtadh ach am biodh peacaidhean mòrain
air am maitheadh.
Òlaibh uile dheth.

Faodar na samhlaidhean a thoirt chun a’ choitheanail anns na suidheachain, no da faodaidh na buill tighinn cruinn mu Bhòrd an Tighearna.

An dèidh do na h-uile a bhith air an riarachadh, tha na soithichean air an cur air ais air Bòrd an Tighearna agus thèid an còmhdach.

18. Ùrnaigh

Abradh an ministear:
Dèanamaid ùrnaigh.

A Dhè ghràsmhoir,
tha sinn a’ toirt taing dhut airson a’ ghràidh sin
a tha a’ toirt thugainn bìdh i nèamh,
beatha do Mhic ghràdhaich,
gràdh a tha a’ toirt dearbhachd dhuinn gum buin sinn
do chuideachd nan creidmheach
air nèamh agus air thalamh.

Deònaich gum bi sinne,
agus sinn air ar neartachadh leis a’ cho-chomann an seo
agus le cumhachd an Spioraid Naoimh,
a’ cur air adhart ‘obair-san anns an t-saoghal,
gus an tig E
gu glòir a rìoghachd shìorraidh;
tre Ìosa Crìosd,do Mhac, ar Tighearna.

Amen.

Glòir do Dhia an t-Athair,
a thug air ais o na mairbh
ar Tighearna Ìosa Crìosd
agus a chuir crùn na glòire air a cheann.

Glòir do Dhia am Mac,
a tha beò gu bhith a’ tagradh ar cùise
aig deas-làimh Dhè,
agus a thig a-rithist
gu bhith a’ dèanamh nan uile nithean nuadh.

Glòir do Dhia an Spiorad Naomh,
a tha a’ toirt thugainn blasaid
de Fhacal math Dhè
agus cumhachd na linne ri teachd.

Amen! Moladh agus glòir agus gliocas,
buidheachas agus urram,
neart agus cumhachd a bhith do ar Tighearna gu sìorraidh!

Amen.

19. Salm no Laoidh

(Leithid Salm 103: 1 – 3)

20. Am Beannachadh

Gu robh beannachd an Tighearna Uile-chumhachdaich,
beannachd an Athar, agus a’ Mhic,
agus an Sprioraid Naoimh,
maille ribh a-nis agus gu sìorraidh.

Amen.

21. Faodar an t-aran agus am fìon a thoirt as an Eaglais, agus an coitheanal ’nan seasamh.

Categories
Uncategorised

Dè a th’ anns a’ Bhìoball?

[A’ tighinn a dh’aithghearr]